ပခုက္ကူဆေးရုံကြီး၌ HIV လူနာမှတ်ပုံတင်သူ ဦးရေ ၂၀၀၀ နီးပါး ရှိလာ

ပခုက္ကူပြည်သူ့ဆေးရုံကြီး၌ HIV လူနာမှတ်ပုံတင်ပြုလုပ်သူနှင့် ART ဆေး လာရောက်ထုတ်ယူသူဦးရေ ၂၀၀၀ နီးပါးထိ ရှိလာကြောင်း သတင်းရရှိပါသည်။

ပခုက္ကူပြည်သူ့ဆေးရုံကြီးသို့ HIV လူနာမှတ်ပုံတင်ခြင်းနှင့် ART ဆေး လာရောက်ထုတ်ခြင်းအား မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီးအတွင်းရှိ မြို့နယ်များနှင့် ချင်းပြည်နယ်အတွင်းရှိ မြိုနယ်များမှ လူနာများ လာရောက်ထုတ်ယူကြကြောင်း သိရသည်။

ပခုက္ကူဆေးရုံကြီးသို့ HIV လူနာ မှတ်ပုံတင်ခြင်းနှင့် ART ဆေး အခမဲ့ဖြန့်ဝေခြင်းအား လာရောက်ထုတ်ယူခြင်း ပြုလုပ်သူဦးရေသည် ယခင်နှစ်များထက် ပိုမိုများပြားလာသော်လည်း ပြင် ပဆေးဆိုင်များမှ ART ဆေးဝယ်ယူသောက်သုံးသူများလည်း ရှိနေသေးကြောင်း ဆေးဆိုင်များမှ စုံစမ်းသိရှိရသည်။

ပြင်ပမှ ဆေးဝယ်သောက်သုံးသူများသည် ပြည်သူ့ဆေးရုံတွင် လူနာမှတ်ပုံတင်ခြင်း ပြုလုပ်ပါက အမည်နှင့် နေရပ်လိပ်စာအား အများသိမည်ကို စိုးရိမ်ခြင်းများနှင့် အချို့ဝေဒနာရှင်များမှာ ART ဆေးထုတ်ယူရန် သွားလာနေထိုင်စရိတ် အဆင်မပြေခြင်းများကြောင့် ဖြစ်ကြောင်း သိရသည်။

“မှတ်ပုံတင်ရင် ကိုယ့်အမည်နဲ့ နေရပ်လိပ်စာတွေကို အများသိမှာ စိုးရိမ်ကြတယ်။ ဒါပေမယ့် သက်ဆိုင်ရာဌာနတွေက ဒါတွေကို လျှို့ဝှက်ပေးတယ်။ နားလည်မှုအားနည်းတဲ့ အပိုင်းတွေရှိတယ်။ တချို့ကြတော့လည်း ဆေးလာထုတ်ရမယ့်နေရာတွေကို သွားလာနေထိုင်စားသောက်စရိတ် အဆင်မပြေ တာတွေကြောင့် မှတ်ပုံတင်တာမလုပ်ဘဲ နေကြတယ်။ အရင်ထက်စာရင် HIV လူနာမှတ်ပုံတင်ပြီး ART ဆေး လာထုတ်သူများလာပြီ” ဟု နှစ်သိမ့်ဆွေးနွေးခြင်းများတွင် ပါဝင်ဆောင်ရွက်နေပြီး ART ဆေး သောက်သုံးနေသူတစ်ဦးက ပြောသည်။

“ပခုက္ကူဆေးရုံကြီးကို ဆေးလာထုတ်တာတော့ နယ်စုံကလာတယ်။ မကွေး၊ စစ်ကိုင်း၊ မန္တလေးတိုင်းဒေသ ကြီးနဲ့ ချင်းပြည်နယ်ထဲက မြို့တွေကနေ လာထုတ်ကြတယ်။ အရင်ကဆို ဆေးလာထုတ်သူတွေအနေ နဲ့ နေထိုင်ရေးအခက်အခဲတွေ ရှိတယ်။ နောက်ပိုင်း HIV ဝေဒနာသည်တွေ ဆေးလာထုတ်ရင် နေထိုင် ဖို့အတွက် လူမှုရေးအသင်းတွေက ကူညီလို့အဆင်ပြေလာတယ်” ဟု ၎င်းကပြောသည်။

ပခုက္ကူပြည်သူ့ဆေးရုံကြီးရှိ ခုခံကျ၊ ကာလသားရောဂါ တိုက်ဖျက်ရေးဌာနသို့ မည်သည့်မြို့မှ HIV ဝေဒနာရှင်မဆို မှတ်ပုံတင်ပြုလုပ်ပြီး ART ဆေး ထုတ်ယူနိုင်ကြောင်း တာဝန်ရှိသူတစ်ဦးထံမှ သိရသည်။

Ref: Eleven Media Group